Օրերս Սպենդարյանի անվան Օպերայի և բալետի ակադեմիական թատրոնի շենքում տեղի ունեցավ «Ուժեղ Հայաստան Ռուսաստանի հետ. հանուն նոր միության» շարժման հիմնադիր համաժողովը: Միջոցառման ավարտից հետո շարժման անդամներն ու համակիրները «Նիկոլ, ու՞ր են մեր տղերքը, ու՞ր են մեր հողերը» վանկարկումներով, երթով Ազատության հրապարակից շարժվեցին դեպի Հանրապետության հրապարակ։

«Հայոց պետականության և հայ ժողովրդի պատմության արդի ծայրահեղ վտանգավոր փուլում մենք հասկանում ենք, որ հայ ժողովրդի, Հայաստանի Հանրապետության և Արցախի Հանրապետության անվտանգ գոյությունը, ապագան և բարգավաճումը մեր դարավոր բարեկամ և դաշնակից Ռուսաստանի հետ նոր քաղաքական միության ստեղծման, Ռուսաստանի հետ հզոր Հայաստանի կառուցման մեջ են, ինչը հնարավոր է միայն այն պայմաններում, եթե Հայաստանը մտնի Ռուսաստանի հետ Միութենական պետության մեջ։ Այս տեսլականը իրականություն դարձնելու համար մենք հիմնում ենք «Ուժեղ Հայաստան Ռուսաստանի հետ. հանուն նոր միության» նախաձեռնությունը»,- ասվում է շարժման տարածած հաղորդագրության մեջ։

Նախաձեռնության անդամներն են, հիշեցնենք, ՍԻՄ կուսակցության նախագահ Հայկ Բաբուխանյանը, «Ազգային միաբանություն» կուսակցության նախագահ Արտաշես Գեղամյանը, Ղրիմի աշխարհազորայինների միության ղեկավար Արմեն Մարտոյանը, «Բարեպաշտ սերունդ» հիմնադրամի նախագահ Վահրամ Մկրտչյանը, որը նաեւ շարժման համակարգողն է, «Արդարություն եւ բարգավաճում» կուսակցության նախագահ Գայ Պետրոսյանը և մի շարք այլ քաղաքական դեմքեր։

Միջոցառմանը ներկա էր և ելույթ ունեցավ նաեւ «Ալյանս» կուսակցության ղեկավար Տիգրան Ուրիխանյանը, որը ինչպես դահլիճում հայտարարվեց, առաջինն էր, ով պատերազմից հետո խոսեց Ռուսաստանի հետ միութենական պետություն ձևավորելու անհրաժեշտության ու կարևորության մասին։ Թե՛ համաժողը, թե՛ արդեն դրանից հետո իրականացրած երթը սակայն, գոնե համացանցում, լավ չընկալվեց, ավելին՝ շարժման անդամներին ու միջոցառման մասնակիցներին սկսեցին մեղադրել հակասահմանադրական հավաք անցկացնելու, ՀՀ պետականության դեմ ուղղված գործողությունների գնալու մեջ։ Քննադողներից մեկն էլ քաղաքագետ Արա Պապյանն էր, որը  ԱԱԾ-ին նաև կոչ էր արել հետևողական լինել, գնալ համաժողովի հետքերով։

Մեզ հետ զրույցում Պապյանը կրկին տեղի ունեցածը հակասահմանադրական համարեց։

«Սահմանադրությունն ինքնին Հայաստանը հռչակում է ինքնիշխան, ժողովրդավար, անկախ երկիր, հետևապես ցանկացած գործողություն, որը  հակասում  է սահմանադրությանը, հակասահմանադրական է և հակաօրինական։ Նմանատիպ որևէ միության մեջ մտնելը ինքնիշխանության կորուստ է ու վերջ։ Այստեղ իրենք կարող են այլ բաներ ասել, թե ինքնիշխանության կորուստ չենք ունենալու, բայց դա խորամանկություն է»,- ասաց Պապյանը։

«Այստեղ խոսքը գնում է մի շարք ընդհանուր բաների մասին, ենթադրենք՝ արտաքին քաղաքականության։ Ես շատ լավ գիտեմ՝ իրենք օրինակ են բերում Եվրոմիության օրինակը, բայց այնտեղ այլ իրավիճակ է։ Այն անկախ պետությունների միություն է, որտեղ ամեն բան կոնսենսուսով է ընդունվում։ Իսկ մենք տեսել ենք, որ անգամ Ռուսաստանի հետ երկկողմ հարաբերությունների պայմաններում մեր իրավունքները չեն հարգվում,էլ ուր մնաց նույն միության մեջ գտնվելով հարգվեն։ Երկրորդը՝ կստեղծվի մի իրավիճակ, երբ որ չափից ավելի անհավասար միավորներ կլինեն նույն միության մեջ։ Հիմա ես մի հասարակ հարց տամ, այդ միութենական պետության պաշտոնական լեզուն ո՞րն է լինելու, իհարկե ռուսերենը, իսկ Եվրոմիությունում այդպես չէ։ Հարց է առաջանում՝ ի՞նչ խորհրդարան է ունենալու այդ միութենական պետությունը, այսինքն՝ Հայաստանն ու Ռուսաստանը հավասար ներկայացվա՞ծ են լինելու»,- ասաց Պապյանը։

Խոսելով Ռուսաստանի հետ միութենական պետություն ձևավորելու իրավական ճանապարհի մասին, Պապյանը նշեց. «Ես չգիտեմ, իրենք ոնց են պատկերացնում , բայց ես մի բան գիտեմ, որ դա հակասահմանադրական է։ Այո, հանրաքվե պիտի լինի, բայց նախ պետք է հանրաքվեի դրվի սահմանադրությունը փոխելու հարցը։ Արդեն փաստորեն փոխած սահմանադրության հիման վրա պետք է դա հաստատվի և լինի։ Ես լուրջ կասկածներ ունեմ, որ սա իրականում Ռուսաստանին պետք է, թե ոչ։ Կարծում եմ՝ սա ուղղակի ճնշում է Հայաստանի նկատմամբ, իսկ իրականում Ռուսաստանը ցանկություն չունի, ասենք, Հայաստանի ծախսերը իր վրա վերցնելու։ Սա, ասեմ, հերթական քաղաքական քծնանքն է մերոնց կողմից՝ Ռուսաստանի նկատմամբ։ Տեսեք, մենք Ռուսաստանի հետ ՀԱՊԿ անդամ ենք, ունենք ստորագրած մի շարք փաստաթղթեր, հիմա եթե դա բավարար չէ մեր անվտանգության համար, ուրեմն նշանակում է այս դեպքում ևս իր պարտականությունները կարող է չկատարել, ի՞նչ է եղել։ Ես կարծում եմ, որ շարժման մասնակիցները չեն հաջողելու, քանի որ ամեն մի ժողովուրդ ձգտում է անկախության, իսկ դա ինքնադրսևորման և նույն անվտանգության լավագույն հենքն է։ Ես չեմ կարծում, որ մենք կկարողանանք մի միութենական պետության մեջ մեր ձայնը լսելի դարձնել, երբ այստեղ լինելու ենք ուղղակի ճնշող փոքրամասնություն»,- ասաց Պապյանը։

Նա հավելեց, որ Ռուսաստանի հետ միութենական պետություն ձևավորելիս Հայաստանը կզկրկվի, իր խոսքով, ամենակարեւորից՝ արևմտյան աջակցությունից։

«Ես կարծում եմ, որ այսօրվա մեր բոլոր խնդիրների պատճառը հենց այդ միակողմանիությունն է, ամեն ինչ տվել ենք Ռուսաստանին, իսկ Ռուսաստանը ինքն է հենց քայքայվող պետություն»,- ասաց Պապյանը։